Дуетот „Проблем“ што Аца Лукас го сними со Маја Беровиќ во 2019 година е целосно отстранет од Јутјуб, откако фолкерот побарал спотот да биде избришан од платформата. При пребарување на песната, сега стои известување дека видеото не е достапно поради барање за авторски права од Лукас.
Од неговиот тим објаснуваат дека пејачот нема намера други изведувачи да заработуваат на неговите дела.
„Песната е симната од друг канал бидејќи Аца ги полага сите права. Тој како уметник нема повеќе да дозволи некој да заработува врз основа на неговото име и работа“, изјави Саша Мирковиќ, сопственик на ‘Хајп’ продукција и телевизија.
Лукас дополнително беше мошне јасен: „Особено не некои пејачки што никој не ги ни знае“.
По отстранувањето на спотот, реагираше и самата Беровиќ. Таа тврди дека не знае зошто песната е избришана и дека дуетот никогаш не бил нејзина сопственост.
„Песната ‘Проблем’ не е моја. Јас бев поканета од Аца Лукас да снимиме дует. Не знам зошто е тргната песната, никогаш не сум ни прашала“, изјави пејачката.
Ова не е единствениот дует што Лукас го избришал од платформи. Слична судбина претходно имале и соработките со Ивана Селаков и Цеца Ражнатовиќ.
Фолкерот одамна инсистира дека неговите песни нема да стојат на туѓи канали без договорена заработка.
„Не може повеќе некој да има песна со мене на свој канал, а да не плати ништо. Учествував во реализацијата, придонесов да бидат слушани, а само другите заработуваа. Нема повеќе. Ни кај баба нема за џабе“, изјави тој порано за српските медиуми.
