„Глобал калчр инишијатив“ вчера ја објави листата со победници на фестивалот „Ворлд фолк вижн 2020“. Во категоријата за најдобра песна победник е македонскиот годинешен преставник на Евровизија – Васил Гарванлиев со песната „Ѓердан“.
На овој глобален фестивал учествуваа повеќе од 4.000 реномирани уметници од пет континенти, а гласањето траеше еден месец и воедно беше вклучено 44-члено професионално жири од повеќе земји од светот. Организаторите известија дека повеќе од 26 милиони гласачи од 150 земји одлучиле за победниците во три категории: инструменти, глас и танц кои оваа година поради новонастанатата ситуација со ковид19 се одвиваше на нивната платформа онлајн.
„Сѐ уште не ми е верно, чест ми е што ја претставувам Македонија на ваков светски реномиран фестивал, и особено сум среќен што одлучивме токму со „Ѓердан“ да учествувам – песната која ја посветив на нашата тактовина и која ме врати назад во моето родно место. Оваа награда ја посветувам на сите тие што веруваа во мене, на мојата земја и на сите уметници кои творат и не се откажуваат од својот сон дури и во вакво време – изјави Гарванлиев.
Песната „Ѓердан“ беше објавена во септември 2018, музиката е на Саша Драгиќ, текстот на Весна Малинова со аранжман на Диран Тавитијан.
Ова е историски момент за македонската музичка сцена и прва голема победа на Васил на интернационално ниво. Васил ќе настапи на гранд финалето кое ќе се одржи од 1-7 ноември оваа година во Катар.
