Големото музичко натпреварување, Евровизија, се одржа синоќа, но сосема различно од претходните години, поради епидемијата на коронавирусот.
Водителите ја отворија вечерта поздравувајќи ги Европа и Австралија, која веќе неколку години се натпреварува.
Она што годинава се разликуваше е што всушност немаше натпреварување меѓу претставниците на државите, односно нема победник, а учесниците испратија пораки од своите земји.
Македонија ја претстави Васил Гарванлиев:
„Добро вечер Европа! Отворете ги срцата да прославиме вечер полна со љубов. Вечерва сите сме победници. Иако ја немав можноста да застанам на евровизиската сцена и да ја преставам Македонија во Ротердам, многу сум горд што сум дел од вечерашното шоу Europe Shine a Light. Ова е само почетокот! Ве сакам“, вели Васил.
Освен со песната со која требаше да ја претставува Македонија, Васил беше претставен и со дел од спотот за песната „Гердан“, во кој можеа да се видат Колешинските водопади.
Изменетата евровизиска вечер нè потсети на многу познати евровизиски хитови, а српската победничка Марија Шерифовиќ, низ празните улици на Белград ја отпеа победничката „Молитва“.
На синоќешниот настан беше најавено дека Ротердам ќе биде домаќин на Евровизија 2021.
