Познатиот македонски готвач и ТВ-лице Никола Мишковски, познат како шеф Никола, сподели искрена порака на социјалните мрежи откако се соочил со здравствен предизвик.
Четириесет и едногодишниот готвач не откри детали за својата здравствена состојба, но раскажа дека ова искуство го натерало да размисли за начинот на кој живеел и за годините во кои честопати потребите на другите ги ставал пред сопствените.
Мишковски, кој е татко на три деца, работи како главен шеф во скопскиот ресторан „Чардак“, дел е од кулинарското шоу „Брза кујна“, а повеќе од една деценија е и лиценциран судија по готвење.
Во својата објава на социјалните мрежи тој призна дека постојано се обидувал да ги исполни обврските и очекувањата на луѓето околу себе, додека себеси често се ставал на последно место.
„Цел живот се давав без резерва.
За работата, за луѓето, за туѓите проблеми…
Секогаш гледав сите околу мене да бидат задоволни, сè да биде завршено, никој да не остане без одговор и никого да не разочарам.Трчав, решавав, премолчував, издржував…
И многу често себеси се ставав последен.
А потоа животот во еден момент те запира.
Без да те праша дали имаш обврски, дали некој те чека, дали утре треба да бидеш на работа.
И тогаш сфаќаш нешто многу едноставно:
Ниту една работа, ниту една функција, ниту едно ‘мора’, не вреди повеќе од животот, здравјето и луѓето што искрено те сакаат.
Не жалам што сум бил човек што се давал целосно.
Но, од денес ќе научам дел од таа енергија да ја чувам и за себе.
На оние неколку луѓе што беа до мене кога навистина ми требаа – знаете кои сте.
Нема да ви го заборавам тоа.
Понекогаш мора нешто силно да те потресе за повторно да сфатиш што навистина е важно во животот“, напиша тој.
Мишковски не прецизираше со каков здравствен предизвик се соочил.
