Првиот руски канал прикажа симулација на уништување на европските градови што атомското оружје може да го предизвика. Москва повторува дека не сака нуклеарна војна, а западните аналитичари гледаат се поголема опасност во наративот на војната што следи.
Од почетокот на конфликтот, руската телевизија одигра одлучувачка улога во дефинирањето на тоа што Русите треба да го знаат за тековната војна во Украина. И од самиот почеток, таа се најде во позиција да ја негира реалноста . Сега, пак, државната телевизија ја проширува својата улога – а западните аналитичари гледаат се поголема опасност во наративот на војната што следи. Во изминатите неколку часа, на пример, на руската телевизија беше прикажана застрашувачка симулација за тоа како може да се развие руски нуклеарен напад врз некои европски метрополи – Лондон, Берлин, Париз.
Според некои од гостите на едно од главните руски ток-шоуа „60 минути“, кое се емитува на Првиот канал, до овие градови нуклеарната бомба ќе стигне во рок од 200 секунди по лансирањето на ракетите од базата Калининград. Односно, 106 секунди до Берлин, 200 секунди до Париз и 202 секунди до Лондон.
Алексеј Журављов, претседател на националистичката партија Родина, рече дека „ракетата Сармат би била доволна за Британските острови повеќе да не постојат“. „Зборувам сериозно“, рече тој, додека друг гостин објасни дека „и Британија“ има нуклеарно оружје и дека „никој нема да ја преживее оваа војна“.
Дека зборовите на Журављов не биле неочекувани, докажува фактот што на телевизијата – во моментот додека тој ова го зборувал – била прикажана графика со хипотетичката проекција на „патот“ на траекторија на проектилите кои би можеле да бидат лансирани од Калининград, руска енклава сместена меѓу Полска, Литванија и Балтичкото Море – до Берлин („106 секунди“) , Париз („200 секунди“) и Лондон („202 секунди“).
Овие реченици се изречени на националниот, Првиот канал, додека Русија продолжува да тврди дека нема намера за нуклеарна конфронтација со Западот. Сепак, Владимир Путин, три дена по почетокот на инвазијата на Украина, наредил да се стави во состојба на готовност системот за нуклеарна одбрана.
За време на состанокот со министерот за одбрана Шојгу во Кремљ, Путин рече дека „западните земји не само што ни воведуваат непријателски санкции, туку и лидерите на големите земји од НАТО даваат агресивни изјави кон Русија. Затоа наредувам системот за одбрана да се стави во состојба на готовност. Последиците, рече тој, ќе бидат какви што никогаш не биле видени во историјата“.
Минатата недела Путин рече дека хиперсоничните ракети на Москва имаат способност да го надминат секој одбранбен систем во светот. Она што ги вознемири западните аналитичари, повеќе од хипотезата за употреба на нуклеарно оружје врз европските метрополи, е фактот дека руската телевизија бомбардира со изјави кои повикуваат на ескалација – претставувајќи ја како неопходна за победа во егзистенцијалниот предизвик. Потпретседателот на Думата ја нарече војната со Украина „метафизички судир меѓу силите на злото и оние на доброто, света војна во која мора да победиме“.
Неодамна генералот Миникаев, рече „ние сме во војна против целиот свет“, додека шефот на руската дипломатија – министерот за надворешни работи Сергеј Лавров – објасни дека „ НАТО води индиректна војна против Русија “, а самиот Путин изјави дека „Западот и НАТО се обидуваат да ја уништат Русија одвнатре“.
„Нашите подморници се способни да лансираат повеќе од 50 нуклеарни проектили, што ќе гарантира уништување на САД и НАТО“, рече Дмитриј Кисељов на почетокот на неговата емисија во неделата на 28 март. „Каква корист би имал светот без Русија?“, праша тој.
View this post on Instagram
