По вчерашната вест дека Весна Змијанац заврши во Ургентен центар поради нагло влошување на здравствената состојба, нејзината ќерка Николија Јовановиќ се огласи и ги смири загрижените фанови.
Како што рече на прес-конференција по повод нејзиниот солистички концерт, Весна во моментов е на планината Букуља и се чувствува стабилно.
– Мајка ми е добро, не е тајна дека има срцеви проблеми и дека временските промени знаат да ја погодат. Најважно е што секогаш бара медицинска помош кога ќе почувствува потреба – изјави Николија.
Според неа, лекарите направиле прегледи и утврдиле слаби аритмии кои не се заканувачки, но предупредиле дека ѝ е потребен одмор.
– Се надевам дека конечно ќе нѐ послуша и ќе си дозволи малку мир. Во одредени години луѓето се како деца – не сакаат да слушаат – рече низ насмевка пејачката.
Весна Змијанац самата ја повикала Брзата помош откако почувствувала прескокнување на срцето, но по направените прегледи одбила да остане во болница. Според сведоци, инсистирала да си замине на сопствена одговорност и самата повикала такси.
Во изјава за српските медиуми, Змијанац потврди дека станува збор за аритмии поврзани со временските промени и заморот.
– Навистина ми се слоши, иако не сум од оние што за секоја ситница ќе одат во болница. Очигледно се префорсирав, а не сум навикната да пеам толку често во лето. Сега сум дома, се чувствувам подобро, ќе ја почитувам терапијата и ќе се одморам – изјави Весна.
Фановите се надеваат дека пејачката ќе ја послуша својата ќерка и ќе се фокусира на здравјето, а не на сцената – барем за извесно време.
