Српската пејачка Марија Шерифовиќ синоќа одржа концерт во главниот град на Црна Гора, а целата сала замолкна кога музичката ѕвезда му посвети песна на убиеното девојче Данка Илиќ од Бор.
Концертот во Подгорица е втор на турнејата на Марија наречена „Долази љубов“, а пред полна Арена пејачката го отвори со песната „Другачија“.
Публиката ги пееше нејзините хитови во дует со Марија, но најемотивниот момент на вечерта беше кога Марија им се обрати на присутните и ја посвети песната „Добар вам дан“ на убиената Данка Илиќ од Бор.
– Јасно е кому е посветена оваа песна – рече Марија на крајот од изведбата на песната, кога во салата владееше молк.
Инаку, на претходниот концерт во Загреб, Марија Шерифовиќ им го посвети моментот кога ја изведе песната „Добар вам дан“ на жртвите на насилство.
На концертот во Подгорица специјален гостин беше Данијел Алибабиќ, а заедно ја изведоа песната „Пола сунца“.
Пејачката Марија Шерифовиќ на својот инстаграм-профил објави црна позадина со емотикон со скршено срце, симболично прикажувајќи ја нејзината тага поради овој трагичен настан, убиството на малата Данка.
