Музичката група „Магазин“ остави силен белег на југословенската, а потоа и на хрватската музичка сцена. Љиљана Николовска, Данијела Мартиновиќ, Јелена Розга, Ивана Ковач и Андреа Шушњара се пејачките кои ги испеаја најголемите хитови на „Магазин“ во четиридецениското постоење на групата, поточно од 1979 година.
Сега е време за нова етапа за „Магазин“ и, секако, нов вокал – 22-годишната пејачка Лорена Буќан. Таа е музичка надеж од Сплит, која веќе неколку години го гради својот пат во музиката. Буќан веќе има неколку солистички песни, со кои го покажа својот талент и многумина ја нарекуваат „наследничка на Дорис Драговиќ“.
Оваа млада пејачка ѝ е позната на хрватската јавност и по музичкото натпреварување „Суперталент“, како и по учеството на „Дора“ во 2019 година, фестивал кој е и национален избор за песна на Евровизија во Хрватска. Буќан имаше чест да настапи и како воведен акт на концертот на италијанскиот пејач Ерос Рамацоти во Пула.
Исто така, таа има освоено повеќе награди за својата музичка работа.
„За мене наградите се показател за мојот мал белег во овој голем музички свет и некаков физички доказ дека трудот на мојот тим и јас вроди со плод. Можам да кажам дека малата Лорена сонуваше да добива награди, а денес таа навистина ги живее нејзините соништа. Исто така, секогаш кога ќе ги погледнам тие полици со награди дома, сè уште не ми влегува во глава дека тие награди се навистина мои. Понекогаш сето тоа звучи нереално. За мене е уште понереално кога ќе слушнам дека луѓето ги пејат моите песни…“, изјави новата пејачка на „Магазин“ за „Јутарњи лист“.
Буќан е понесена од музиката уште од детството и вели дека не престанува да истражува.
„Како малечка, многу гледав анимирани филмови со Барби, односно секаде каде што имаше пеење или играње. Омилена работа ми беше да стојам пред телевизор и да го следам секое движење, да ја пеам секоја песна… Јас бев таму, во тие моменти, на мојата сцена, во мојот сопствен свет. Како што растев, истражував нови жанрови. Како резултат на тоа, навистина ми се допаѓа музичката разновидност. Сè уште истражувам, неуморно барам нешто ново“, изјави таа.
