Белградскиот актер беше меѓу оние типови по кои воздивнуваа сите жени од бившите држави. Една од најистакнатите улоги на денес 71-годишниот актер, беше во култната серија „Отпишаните“, во која го глумеше ликот Тихи. За Војо се знае речиси сè, но во јавноста малку е познато дека има маркантен син, кој ја наследил неговата добра генетика.
Легендарниот актер Воја Брајовиќ 18 години е во среќен брак со 23 години помладата актерка Милица Михајловиќ, со која го има синот Реља. Но, малкумина знаат дека зад себе има уште еден брак, од кој со поранешната сопруга Лилјана ја има ќерката Искра Брајовиќ Бабиќ, исто така актерка, и синот Вукота.
– Најтешка, а можеби и најлоша улога, воедно и најодговорна е да се биде родител, бидејќи децата не стануваат свои луѓе, туку остануваат наши деца додека нивните родители се живи. Додека сум жив, ќе им бидам поддршка на моите деца, но како тие ќе им бидат потпора на своите деца? Не зборувам сега само за моите наследници, туку за сите нови генерации – изјави Воја одамна во едно интервју.
Пред неколку години неговиот син Вукота Брајовиќ стана еден од најбараните манекени во Србија, но потоа го напушти светот на модата и се посвети на работата во филмската индустрија. Се појави во филмот „Зона на мртвите“, во кој беше сценарист, продуцент и актер. Го води модниот блог „Стајл бај Вукота“ на кој ги следи новитетите во светот на машката мода.
– Фактот дека некој ве следи во позитивно светло не може да не годи, но никогаш не сум бил некој кој му придава големо значење на тоа. Важно е некој да го препознае она што го работите и преку кој било вид творештво да допрете до луѓето. Дури тогаш сте направиле нешто импозантно – порача Вукота во интервју за еден портал.
Популарноста на татко му никогаш не му била товар, туку секогаш бил горд на неговиот успех исто како што би бил горд на личниот успех.
– Како мал мислев дека тешко ќе го повторам неговиот успех и носев низа погрешни и чудни одлуки. Како што велат, станав бунтовник без причина. Тоа не ми помогна во кариерата, но препознатливоста на презимето е нешто што не штети, особено ако сакате да им презентирате некој свој проект на потенцијални партнери – изјави Вукота, кој обожава хорор-филмови, рокенрол музика, долги прошетки и џогинг.
