Српскиот фолк пејач Аца Лукас беше уапсен синоќа во Кавадарци. Сега видео од овој настап се појави на социјалните мрежи.
На него може да се види Лукас кој е целосно „во свој елемент“, т.е. свири на тапани, обвиткан во знамето на Македонија.
Македонската полиција го приведе пејачот во текот на неговиот настап кратко по полноќ во Кавадарци, а видео од неговото приведување пред локалот се појави на Инстаграм.
„На 22 ноември во 00:10 часот, полициски службеници од ОВР Кавадарци го приведоа А.В. (57 год.) од Република Србија. При вршење на акциска контрола во угостителски објекти на подрачје на Кавадарци, од страна на полициски службеници од ОВР Кавадарци, Одделение за криминалистички работи при СВР Велес, инспектор за странци од Регионален центар за гранични работи Југ, било констатирано дека во угостителски објект во Кавадарци А. В. настапувал без потребната дозвола“, рече Биљана Ѓаковска, портпарол на СВР Велес.
Против Лукас била поднесена прекршочна пријава по член 217 став 1 точка 2 од Законот за странци. За турбофолкерот била поднесена прекршочна пријава во Основен суд Кавадарци. Од Основен суд Кавадарци соопштија дека на Аца Лукас му била изречена парична казна во висина од 50 евра.
