Луксузната модна платформа Фарфеч спроведе истражување што покажа дека Кејт е единствената припадничка на кралското семејство која во моментот се наоѓа меѓу врвните десет модни икони.
Кејт, која е позната по својата љубов кон „хајстрит“ брендовите и паметните комбинации на бои, е единствената кралска фигура што беше вклучена во листата составена од луксузната веб-страница.
Единствено британската модна дизајнерка Викторија Бекам (46) со својот стил успеа да ја надмине војвотката од Кембриџ. Стилот на Викторија освои 28 отсто од испитаниците, додека Кејт доби 24 отсто од гласовите.
Кејт е позната по рециклирање на парчињата облека што веќе ги носела. Во текот на последните неколку месеци, за време на пандемијата Кејт носеше фустани од големи британски дизајнерски имиња, вклучувајќи ги Сузана, Стела Мекартни и Емилија Викстед. Војвотката честопати комбинираше некое постаро парче облека со нешто ново за неодамнешните јавни појавувања.
Меѓутоа, на листата на модни икони не се најдоа Меган Маркл (39) ниту кралицата Елизабета Втора (94).
Викторија Бекам, пак, во последните години е синоним за стилска трансформација – од кралица на модните промашувања до најстилизирана личност на денешницата. Викторија безброј пати докажа дека е неприкосновена кога се во прашање модните избори. Нејзиниот беспрекорен стил го копираат жените низ целиот свет, а нејзините совети – без разлика дали станува збор за избор на облека или за нега на лицето, телото, косата – се сметаат за заповеди на „убавината“.
Комбинациите на облека што ги избира Викторија Бекам се толку моќни што некои тврдат дека таков рафиниран вкус не може да се купи со пари, туку дека поранешната пејачка на „Спајс грлс“ едноставно е природен талент.
Покрај Кејт и Викторија, на листата на топ 10 модни икони се најдоа и американската икона на стилот Оливија Палермо (34), италијанската инфлуенсерка Кјара Ферањи (33), актерката Џејн Биркин (73), поп-ѕвездата Ели Гулдинг (33), британската манекенка и водителка Алекса Чанг (37).
