Нашиот познат композитор, инструменталист и продуцент Николче Мицевски ја освои престижната награда „Best of Pangea – World Music Award“ на глобалните Интерконтиненталните музички награди, (InterContinental Music Awards -ICMA) во Лос Анџелес.
Тој триумфираше со својата авторска композиција „TIME“. Ова е историски успех за македонската музика, со оглед на тоа што тој прво влезе како финалист во огромна светска конкуренција, а потоа и официјално ја однесе победата во категоријата за светска музика (World Music). Мицевски стана првиот македонски автор кој успеал да стигне до самиот врв на ова престижно меѓународно натпреварување.
Радоста ја сподели на социјалните мрежи.
Почестен сум и неизмерно среќен што ја добив наградата за најдобра World Music композиција на Интерконтиненталните музички награди, за мојата “TIME”!!
Благодарам на сите кои ја поддржувате и слушате мојата музика! Оваа наградата за мене значи многу а ќе ја имам и можноста мојата музика да се слуша пошироко во светот со поддршката од организацијата на овој голем светски натпревар! Одиме понатаму -напиша тој.
Наградата „Best of Pangea“ е специфично глобално признание кое се доделува на уметници чија музика ги надминува географските граници и спојува различни култури и традиционални звуци. Името „Pangea“ (Пангеа) се однесува на древниот суперконтинент каде што сиве денешни континенти биле споени во едно, па оттука наградата симболизира музичко обединување на светот.
Честитаме Никола!
