Во авионот патувале 19 патници и тројца членови на екипажот. Авионот летал за Џомсом, популарна дестинација за пешачење на Хималаите. Почна извлекувањето на телата.
Пронајдени се остатоците од авионот што исчезна во Непал, пренесува АФП, повикувајќи се на армиски извори. Авионот на „Тара ер“ кој се упати кон планинска област исчезна вчера со 22 лица (19 патници и тројца членови на екипажот). Самата авиокомпанија го вклучи алармот. Непалските тимови за пребарување ги лоцираа остатоците од исчезнатиот авион. Непалските власти објавија дека досега извлекле 14 тела од остатоците на цивилниот авион кој се урна во планините со 22 лица. „Истражувањето продолжува за останатите“, рекоа оттаму, прецизирајќи дека „времето е многу лошо, но успеавме да се испрати екипа на лице место“.
„Спасувачки тим ги лоцираше остатоците од авионот и сподели фотографија“, рече портпаролот на непалската армија Нарајан Силвал, споделувајќи на Твитер фотографија на која се прикажани остатоците од авионот. Регистерската табличка со број 9N-AET е јасно видлива на она што изгледа како парче браник. Во авионот имало 19 патници – меѓу кои двајца Германци – и тројца членови на екипажот. Силвал рече дека местото на несреќата е во областа наречена Саносвер во Тасанг, регионот Мустанг. Двомоторниот авион полета од градот Похара (централно-западен Непал) вчера во 9:55 часот по локално време (6:10 часот во Македонија) пред да го загуби контактот со контролата на летање, авионот требаше да слета во Џомсом. Контактите, информираат властите, биле изгубени неколку минути по полетувањето од аеродромот во Похара. Авионот бил виден на небото над Џомсом во областа Мустанг, а потоа се упатил кон планината Даулагири, по што трагата била изгубена.
Crash site: Sanosware, Thasang-2, Mustang pic.twitter.com/OcN93N1Qyb
— NASpokesperson (@NaSpokesperson) May 30, 2022
Во потрагата по авионот во изминатите неколку часа се користени два хеликоптери и покрај сите тешкотии поврзани со слабата видливост. Џомсом е популарна дестинација за пешачење на Хималаите, на околу 20 минути со авион од Похара, која е западно од Катманду. Непалскиот пазар за патнички летови порасна во последниве години благодарение на туризмот, но и воздушниот товар се зголеми поради ограничената патна мрежа на Непал. Сепак, безбедноста на домашниот воздушен транспорт страда од недостаток на средства за обука на пилоти и одржување на авиони.
Земјата, исто така, има некои од најодалечените и најтешки мини-аеродроми во светот, опколени со врвови покриени со снег со пристапи кои претставуваат предизвик дури и за искусни пилоти. Во март 2018 година, авион на американската компанија „Бангла ерлајнс“ се урна во близина на меѓународниот аеродром во Катманду, при што загинаа 51 лице.
