Водителката и новинарка Цеце Николова го прослави својот 29. роденден опкружена со блиските, а покрај неа беше и нејзиниот партнер Јане Јанев, естраден менаџер, организатор на настани и букинг агент.
На социјалните мрежи беа споделени моменти од роденденската прослава, а меѓу нив и романтична фотографија на која Цеце и Јане се бакнуваат додека таа ја држи роденденската торта. Прославата започнала уште по полноќ, кога најблиските ја изненадиле водителката за нејзиниот 29. роденден.
Николова неодамна првпат јавно откри дека токму Јане Јанев е човекот со кого е во љубовна врска. На крајот на август таа објави фотографии од нивното заедничко летување во Грција и откри дека прославуваат една година љубов. Дотогаш својот партнер го чуваше подалеку од јавноста, а на фотографиите повремено покажуваше само детали од нивните заеднички моменти.
Јанев е познат во домашните естрадни кругови како менаџер, организатор на настани и букинг агент за македонски артисти. Тој е сопственик на „Lollipop Entertainment Group“, а со Цеце се познаваат и соработуваат веќе неколку години. Николова е ангажирана како ПР-менаџер во неговата компанија, а нивниот професионален однос со текот на времето прераснал во љубовна врска.
Цеце е новинарка и водителка на Канал 5, а во јавноста отворено зборува и за својата животна приказна. Таа пораснала во СОС Детско село и повеќепати зборуваше за детството без биолошките родители, но и за алопецијата со која живее уште од детството.
Во интервјуата Цеце има кажано дека токму тешките животни искуства влијаеле врз личноста што е денес. За жената која ја одгледала во СОС Детско село, мајка Наташа, зборува како за својата вистинска мајчинска фигура.
По една година врска, Цеце повеќе не ја крие љубовта со Јане. Неполни две недели откако првпат јавно го покажа својот партнер, тој беше покрај неа и за нејзиниот 29. роденден.
