Групата „НеоноеН“ победи на неодамна одржаниот „Монтесонг“ со песната „Clickbait“, а сега на своите следбеници им соопштија дека се откажуваат од натпреварувањето по обвинувањата дека ги прекршиле правилата изведувајќи работна верзија на песната пред самиот натпревар.
Иако од бендот истакнуваат дека не ги прекршиле правилата, бидејќи верзијата што ја изведувале на настапите не е иста како онаа што ја претставија на Монтесонг, во интерес на пошироката јавност донесоа одлука да се повлечат од учество.
„Во најдобар јавен интерес, со желба да ставиме крај на неизвесноста и уште еднаш да придонесеме за музиката за која сме, пред сè, тука, ве известуваме дека доброволно се повлекуваме од учеството на Евровизија. Според прописите, РТЦГ ќе избере друг претставник, а ние први ќе му посакаме среќа и ќе му пружиме целосна поддршка“, објави групата на социјалните мрежи.
„НеоноеН“ наведува и дека фестивалот „Монтесонг“, во организација на Здружението на естрадни уметници, донел 16 нови песни, а второпласираната Нина Жижиќ со песната „Добродошли“ најверојатно ќе оди на Евровизија.
Станува збор за пејачка која веќе имаше можност да ја претставува Црна Гора на Евровизија 2013 заедно со групата „Who see“, кога настапија со песната „Игранка“, но не влегоа во финалето.
Да потсетиме, бендот „НеоноеН“ изрази жалење за скандалот што се случи, уште еднаш потенцирајќи дека не се првите изведувачи на Евросонг кои настапуваат со песна која претходно ја изведувале.
„Напоменуваме, а фактите тоа го потврдуваат, дека изведбата во живо на работната верзија на песната ниту го загрози самиот фестивалски процес во Монтесонг, ниту може да влијае на неговиот конечен исход и нашиот пласман. Исто така, факт е дека имаше многу слични примери и дека ЕБУ секогаш одлучуваше тие песни дека можат да учествуваат (една дури и победи на Евровизија), бидејќи немаа конкурентска предност во однос на другите, што на сите им е јасно. Меѓутоа, едноставно не сакаме да бидеме дел од какви било приказни надвор од музиката, ниту на тој начин да го промовираме нашето авторско дело“, изјавија од бендот за „Вијести.ме“.
