Поранешниот шеф на Формула 1 рече дека „би примил куршум“ за рускиот претседател Владимир Путин и го опиша како исклучителен човек. 91-годишниот Берни Еклстон рече дека војната во Украина не била „намерна“ и дека украинскиот претседател Володимир Зеленски можел да ја избегне со своите потези.
Еклстон рече и дека Зеленски требало да разговара со Путин, за кого вели дека е „разумен“ човек.
Во емисијата „Добро утро Британија“ на ITV го прашаа дали тој сè уште го смета Путин за пријател, а тој одговори: „Сепак би примил куршум за него. Би претпочитал да не ме боли, но и да ме боли, сепак би примил куршумот, бидејќи тој е првокласна личност. Она што тој го прави е нешто за кое веруваше дека е вистинската работа за Русија. За жал, тој е како многу деловни луѓе, секако како мене, а ние одвреме-навреме грешиме. Кога ќе направите грешка, треба да направите се што можете за да се извлечете од неа“, рече тој.
Еклстон се осврна и на Зеленски, велејќи дека тој порано бил комичар и дека изгледа „сака да продолжи со таа професија“.
„Да размислуваше, дефинитивно ќе се обидеше да разговара со господинот Путин, кој е разумен човек и тој ќе го слушаше и веројатно ќе можеше да направи нешто во врска со тоа“.
