Легендарниот бразилски фудбалер, Едсон Арантес до Насименто Пеле, напиша емотивно писмо посветено на Диего Марадона, седум дена по смртта на аргетинскиот волшебник со топката. Насловот на писмото е „Те сакам, Диего“.
„Денеска поминаа седум дена откако си замина. Многу луѓе целиот живот сакаа да не споредуваат. Беше гениј кој го маѓепса светот, волшебник со топката во нозете. Вистинска легенда. Но, пред се, за мене секогаш ќе бидеш одличен пријател со уште поголемо срце.
Денеска знам дека светот би бил многу подобар кога би можеле помалку да се споредуваме и да почнеме повеќе да се воодушевуваме. Сакам да кажам дека си неспоредлив.
Твојот пат го одбележа искреност, и на свој единствен и посебен начин не научи дека мораме многу почесто да сакаме и да кажуваме „те сакам“.
Твоето брзо заминување не ми дозволи лично да ти кажам, па едноставно ќе ти напишам: Те сакам, Диего.
Ти благодарам многу за нашето патување мој голем пријателу. Еден ден, на небото ќе играме во ист тим. И тоа ќе биде прв пат триумфално да ги кренам рацете во воздух, а причината да не биде прослава на гол. Тоа ќе биде оти конечно повторно ќе можам да те прегрнам“, напиша Пеле.
