Довчерашните протести на опозицијата против политиките на актуелната владеачка гарнитура, особено кон Бугарија, од денеска прераснуваат во блокада на Скопје. Низ улиците на главниот град, според соопштението на ВМРО-ДПМНЕ, автомобилската протестна поворка ќе биде од 12.30 часот до 14 часот на рута од Министерството за надворешни работи до Владата.
– Заев молчи и не кажува за што се преговарало на тајните разговори во Софија овој викенд. Според нас, Заев сакал да прифати ретуширана историја, откажување од јазикот и македонското малцинство. Тоа значи дека Заев е спремен на ново предавство. Молкот на премиерот во заминување, но и на Димитров, на Османи, на Шекеринска, на цела влада и на цел СДСМ, гласно говори дека оваа однародена власт преговара за идентитетот, за јазичната и национална посебност, за историјата и за антифашистичките столбови на македонската државнос, е наведено во дописот на опозициската партија.
