По повеќе од 20 години, сестрите Маријана и Росана повторно снимија нова песна. Заедно со Дац и Александар ја објавија песната „Засекогаш млади“, за која е снимен оригинален видеоспот, а песната веќе предизвика бројни позитивни реакции кај нивните пријатели и обожаватели.
Маријана со голема возбуда ја сподели песната на социјалните мрежи.
„Конечно нашата нова песна и спотот со Дац и Александар – „Засекогаш млади“. Да сте сите живи и здрави. Живеј го животот затоа што нема реприза“, напиша таа.
Меѓу првите што ѝ честитаа беше пејачката Татјана Лазаревска, која живее во Мелбурн исто како и Маријана и се многу блиску. Таа откри дека долго време посакувала Маријана повторно да снима нови песни.
„Овој момент го чекав, посакував и работев на него долго време, ама крајот го краси делото… Браво, сестрички мои“, напиша Лазаревска.
Маријана ѝ возврати со емотивна порака, откривајќи дека токму Татјана постојано ја охрабрувала да се врати на музичката сцена.
„Точно, мила моја, ти секогаш притискаше и навиваше за нова песна. Александар, Дац, Росанче, а и јас ги разбудивме емоциите на едно убаво, безгрижно време исполнето со љубов, почит и позитивност… време кога бевме млади и остануваме засекогаш млади“, напиша Маријана.
На нивната објава се огласи и Росана, која на Татјана ѝ возврати со симболична црвена роза.
Маријана и Росана беа едни од најпопуларните македонски поп-дуети во 90-тите години, а зад себе оставија повеќе хитови кои и денес се слушаат како „Признавам“, „Едно срце имам душо“, „Ако не исчезнам“ и други.
Во последните години ретко објавуваа нов музички материјал, па „Засекогаш млади“ претставува нивно враќање на сцената по повеќе од две децении. Новата песна е снимена во соработка со Дац и Александар, со кои, како што велат, сакале да ги разбудат спомените на едно безгрижно време исполнето со љубов, почит и позитивност.
