Франција, вчера на полноќ по цели 89 години постоење, ја исклучи услугата „точно време“. Воедно таа е и првата земја што воведе „гласовен часовник“ за информирање за точното време.
Државната телефонска компанија ја откажа услугата за точно време, која чинеше 1,5 евра по повик, бидејќи за неа немаше интерес во ерата на паметните телефони.
Но било сосема поинаку во далечната 1933 година, кога беше воведен првиот автоматски гласовен часовник во Париската опсерваторија, астрономски истражувачки центар.
Пред да се воведе „гласовниот часовник“, вработените морале лично да одговараат на прашањата за точно време на телефоните на опсерваторијата. Точно 20 телефонски линии примале 140.000 повици, од кои само на 20.000 можело да се одговори поради тогашната технологија.
Телефонската услуга „точно време“, инаку, сѐ уште се нуди во други земји. Во Германија, на пример, според „Телеком Дојчланд“ овие повици сѐ уште се прилично популарни, особено во деновите кога времето се менува од летно во зимско и обратно.
