Иранските власти ја уапсија Фариде Морадкани, внуката на иранскиот врховен лидер, ајатолахот Али Хамнеи, откако таа снимила видео во кое властите предводени од нејзиниот вујко ги опишува како „убиствен режим и убивачи на деца“.
Насилното задушување на народните немири предизвикани од смртта на младата Иранка во притворот на полицијата за морал неодамна ја поттикнале оваа млада жена силно да се бори против режимот на нејиниот роднина.
Фариде има 36 години и е голем борец за човекови права. Нејзиниот татко Али Техерани (Морадкани), беше отворен критичар на Хомеини уште на почетокот на Исламската Република. Целото семејство било протерано во Ирак цели 20 години. Откако се вратил во Иран по смртта на Хомеини, Али Техерани бил во домашен притвор со години. Фариде е многу активна повеќе од 20 години, им помага на политичките затвореници, на многу жени и деца – им наоѓа адвокати и пишува за нив. Таа била апсена неколку пати, 4 месеци лежела во самица, пишуваат следбениците на Фариде.
-Таа е храбра дама. Ќе мора да трпи угнетување затоа што зборуваше за поддршка на слободата и хуманоста!, реагираат поддржувачи на Фариде на социјалните мрежи.
Пред да биде уапсена таа објави порака за спас од режимот.
„Слободен свету, биди со нас. Порачајте им на своите влади да престанат да го поддржуваат овој смртоносен режим кој убива деца. Овој режим не е верен на ниеден верски принцип и не познава никакви правила, освен сила и одржување на власт“, порачала Морадкани во своето видео.
Махмуд Морадкани, брат на Фариде, на Твитер напиша дека таа била уапсена на 23 ноември откако отишла во канцеларијата на обвинител по добиена покана.
Братот на Фариде денеска објави видео на Јутјуб каде што таа го осудува „јасното и очигледно угнетување“ на кое Иранците биле изложени и ги повикала странските влади да ги прекинат сите врски со Техеран.
View this post on Instagram
