Мајката на трагично починатата Фросина Кулакова, Камелија, сподели срцепарателна објава по повод роденденот на својата ќерка.
Фросина Кулакова, младата и талентирана дизајнерка трагично го загуби животот во сообраќајна несреќа, оставајќи зад себе семејство, пријатели и недоискажани соништа. Нејзината смрт силно одекна во јавноста, а нејзиното име и понатаму се поврзува со иницијативи и сеќавања кои ја слават нејзината светлина.
Во својот статус, мајката Камелија ја опишува болката од загубата, но и силата на љубовта што продолжува да живее преку сеќавањето и хуманите дела кои се поврзуваат со името на нејзината ќерка.
„Тебе ти ја одзедоа иднината, а ти сè уште им ја подаруваш на другите. Ти ги одзедоа годините што требаше да дојдат.
Креациите што уште не беа нацртани. Патувањата што уште не беа започнати. Љубовта што требаше да расте. Домот што требаше да го создадеш. Децата што можеби еден ден ќе ги држеше за рака.
Ти го одзедоа утрето. Но, не успеаја да го одземат она што го остави зад себе. И затоа, на денот кога требаше да наполниш 24 години, ќе ти донесам 24 бели ружи.Ќе запалам една голема свеќа за животот што го изживеа со толку многу светлина. И 24 мали свеќи за секоја година што засекогаш ќе ја носам во срцето. А, додека пламените треперат покрај твоето име, повторно ќе се роди нечиј сон преку стипендијата што го носи твоето име.
Колку е чуден животот… Тебе ти ја одзедоа иднината, а ти сè уште создаваш иднина за други. Тебе ти го одзедоа патот, а ти сè уште им осветлуваш пат на други. Тебе ти го одзедоа гласот, а твоето име сè уште зборува. И можеби токму во тоа е победата на љубовта над смртта. Затоа што постојат луѓе кои заминуваат. А, постојат и души кои продолжуваат да живеат во секое добро што ќе го остават зад себе.
Среќен 24-ти роденден, Фросинче мое. Денес нема да броиме години. Денес ќе ја броиме светлината. Мама“, пишува во објавата.
22-годишната Фросина Кулакова трагично загина на 29 јануари минатата година, откако беше прегазена на пешачки премин на булеварот Партизански одреди во Скопје.
