Хрватскиот пејач Јаков Јозиновиќ за време на концерт побара од своите обожаватели да престанат да фрлаат мобилни телефони на сцената, предупредувајќи дека ваквата појава станува сѐ почеста и претставува проблем за изведувачите.
Обраќајќи ѝ се на публиката, тој рече:
„Не фрлајте мобилни телефони. Тоа е некој нов тренд. Пеам и гледам во вас, а телефоните ми паѓаат пред нозете.“
Во текот на настапот, Јозиновиќ подигнал еден од телефоните што завршил на сцената и се обратил до неговиот сопственик.
„Разбираш, сега слободно би можел со овој телефон да си одам дома и никогаш да не ти го вратам. Се шегувам, твој ли е?“
Откако снимил кратко видео со обожавателот, повторно ја искористил можноста да испрати порака до останатите во публиката.
„Сега мора да ми го испратиш ова видео. Не фрлајте мобилни телефони. Што да правам? Ќе ги изгазам сите.“
Фрлањето мобилни телефони кон сцената во последните години прерасна во сѐ почест тренд на концертите ширум светот. Дел од посетителите на тој начин се обидуваат да го привлечат вниманието на изведувачите или да добијат снимка што подоцна би станала вирална на социјалните мрежи.
Сепак, ваквото однесување носи ризик и за музичарите и за публиката, а воедно покажува дека кај дел од посетителите желбата за објавување содржини на социјалните мрежи понекогаш станува поважна од самото концертно доживување.
