Падна италијанската влада. Италијанскиот премиер Марио Драги во Советот на министри најави оставка. Се отвора владина криза.
Марио Драги најави дека вечерва ќе му ја достави оставката на претседателот на Републиката, пренесуваат италијанските портали.
„Вечерва ќе ја поднесам мојата оставка до претседателот на републиката“, рече Драги на владата, се вели во соопштението објавено од неговиот кабинет.
Гласањето за доверба стана точка на тензија во владата на Драги.
Драги i претходно изјави дека ќе се повлече доколку движењето „Пет ѕвезди“ се повлече од неговата коалиција и ги повика партиите што го поддржуваат да престанат да поставуваат „ултиматуми“ до неговата влада.
Одлуката на премиерот доаѓа на крајот на драматичниот ден, обележан со вчерашната најава на М5С на Џузепе Конте да не гласа за доверба на владата, изјава која се материјализираше денеска на седницата на Палацо Мадама.
Сепак, не сите се задоволни од оставката на премиерот.
„Италија не може без Марио Драги. Мораме да ја завршиме работата започната пред 17 месеци. Не можеме да ги загубиме, во такви тешки моменти, кредибилитетот и довербата стекнати во Европа и во светот“, на Твитер напиша министерот за јавна администрација Ренато Брунета.
