Угостителката и инфлуенсерка Кристина Кика Живковиќ, која е блиска со семејството на Дарко Лазиќ, објави вознемирувачка снимка од насилството што, како што тврди, го доживеала.
Таа вели дека долго време молчела од страв за себе и своето семејство, но сега одлучила јавно да проговори и случајот да го пријави во полиција.
На снимката што ја сподели Живковиќ се гледа како маж ѝ приоѓа и ја удира со тупаница во главата, по што таа паѓа на подот и останува неподвижна.
На местото потоа ѝ приоѓа гостин од локалот и останува покрај неа, додека напаѓачот повторно се враќа. Според нејзиното сведоштво, тој ја фаќа за раката и ја влече по подот.
Живковиќ наведува дека нападот се случил на 31 мај и дека долго време не се осмелувала да го пријави случајот.
„СТОП ЗА НАСИЛСТВОТО ВРЗ ЖЕНИТЕ! Доста молчев. Доста трпев. Доста се плашев. Сега одлучив да проговорам за она што со години го носев во себе. На оваа снимка сум јас. На неа се гледа физичкиот напад што го преживеав на 31 мај. Се гледа насилството врз мене и моментот во кој луѓето се обидуваат да ме заштитат и да ме одделат од напаѓачот“, напиша таа.
Таа објаснува дека причината поради која долго време молчела не била тоа што настанот не се случил, туку стравот од последиците.
„Долго време не смеев да го пријавам она што ми се случуваше. Не затоа што не се случило, туку затоа што се плашев за себе и за своето семејство. Трпев закани, насилство и заплашување и живеев во страв од тоа што би можело да се случи ако проговорам. Денес повеќе не сакам да молчам“, навела Живковиќ.
Таа потоа го именува лицето за кое тврди дека го поврзува со она што лично го доживеала, но истовремено нагласува дека не сака јавноста да носи пресуда преку социјалните мрежи.
„Господинот Н. Р. од Шабац е лицето со кое го поврзувам она што лично го доживеав и поради што сега им се обратив на надлежните институции. Не сакам никој да носи пресуда преку социјалните мрежи – сакам сè што пријавив да биде испитано, а институциите да ги утврдат фактите“, напиша таа.
Живковиќ тврди дека, освен снимката од нападот, зачувала и други докази за закани, вознемирување и навреди, како и за објавување на нејзини приватни фотографии.
„Покрај оваа снимка, зачував и други докази за закани, вознемирување и навреди, како и за објавување на мои приватни фотографии. Подготвена сум сето тоа да им го предадам на надлежните органи“, навела таа.
Таа им се заблагодарила и на луѓето кои се обиделе да ѝ помогнат во текот на инцидентот, нагласувајќи дека не станувало збор за случајни минувачи.
„Особено сакам да кажам дека луѓето кои таа ноќ се најдоа таму и се обидоа да ми помогнат не беа случајни минувачи. Тоа беа луѓе кои се најдоа во објектот и кои, колку што јас доживеав и видов, исто така беа изложени на непријатности и насилство таа ноќ“, напиша Живковиќ.
Кристина нагласи дека не ја објавува снимката за да повика на одмазда или ново насилство, туку затоа што повеќе не сака да се однесува како ништо да не се случило.
„Не го објавувам ова за да повикам некого на одмазда, навреди или насилство. Го објавувам затоа што сум жртва и повеќе не сакам да се однесувам како ништо да не се случило. Никој нема право да ме тепа. Никој нема право да ми се заканува. Никој нема право да ме заплашува. Никој нема право да ги користи моите приватни фотографии против мене. И никој не треба да се срами затоа што преживеал насилство“, порача таа.
„Јас повеќе не се срамам. Јас повеќе не молчам. Барам само да се слушне мојата страна, да се погледнат доказите и надлежните органи да го направат она што е нивна работа. СТОП ЗА НАСИЛСТВОТО ВРЗ ЖЕНИТЕ. СТОП ЗА МОЛКОТ. ЖРТВАТА НЕ Е ВИНОВНА“, заклучила Живковиќ.
Кристина Живковиќ е угостителка од Шабац и инфлуенсерка која на својот профил има повеќе од 13.000 следбеници.
Таа е блиска со семејството Лазиќ, а на нејзиниот профил има повеќе фотографии и снимки со Дарко Лазиќ, како и со неговиот брат Драган, чија смрт, според текстот, тешко ја поднела.
