Ким Бесинџер по долго време повторно се најде во центарот на вниманието, и тоа поради еден неочекуван потег. Легендарната актерка јавно му го честиташе роденденот на својот поранешен сопруг Алек Болдвин, дури 24 години по нивниот бурен развод, со што ги изненади и него и јавноста.
„Голем среќен роденден, Алек, мој колега од филмот“, порача Бесинџер, а Болдвин не го криеше изненадувањето, нарекувајќи ја нејзината порака неверојатно љубезна и сосема неочекувана. Нивната приказна, сепак, е далеку од идилична.
По бракот со Рон Снајдер, на кого морала да му плаќа алиментација од 9000 долари месечно цели осум години, Ким на снимањето на филмот „The Marrying Man“ се запознала со членот на актерската династија Болдвин, за кого се омажила во 1993 година. Сепак, нивната врска била турбулентна, а разводот во 2002 година еден од најекспонираните во Холивуд.
Борбата за старателство над нивната ќерка Ајрленд Болдвин траеше со години и беше проследена со бројни скандали.
Еден од најконтроверзните моменти се случи во 2007 година, кога во јавноста протече гласовна порака од Болдвин во која својата тогаш малолетна ќерка ја нарече безобразна, бесчувствителна свиња. Снимката предизвика огромен скандал и дополнително ги влоши односите меѓу поранешните сопружници, но и отвори дебата за притисоците и проблемите во славните семејства. Колку биле сериозни проблемите меѓу нив, се виде и во 2008 година со објавувањето на книгата „A Promise to Ourselves: A Journey Through Fatherhood and Divorce“, во која тврдеше дека Бесинџер потрошила повеќе од милион и пол долари за да го спречи во остварувањето на татковските права.
Иако имаше многу врски пред и по Болдвин, ниту една не беше толку експонирана како онаа со него. Сепак, својот мир го пронајде со фризерот Мич Стоун, со кого е во врска од 2014 година.
Со ќерката Ајрленд денес има близок однос, а пред неколку години стана и баба, што ѝ донесе нова животна улога.
Денес Бесинџер живее повлечен живот, далеку од холивудскиот гламур што ја прослави. Една од причините зошто ретко ја гледаме е нејзината агорафобија, која ја следи уште од раниот период на кариерата.
„Како нешто целосно да се затвори во вас и мора повторно да учите сè. Постојано ви се суши устата, се тресете и цело време сте исцрпени“, изјави во еден поткаст, откривајќи и напад што ѝ се случил при одење во продавница: „Тоа беше мојата локална продавница, кошницата ми беше речиси полна, а нешто ме совлада на начин што не можев да дишам. Ја оставив среде продавницата, заминав во автомобилот и потоа не возев шест или седум месеци.“
Во текот на животот имала проблеми и со родителите (со мајка ѝ не разговарала од осумдесеттите до 2015 година) и со финансии, кога по совет на некои членови од семејството при купување на еден остров била принудена да прогласи банкрот.
Нејзиниот неодамнешен потег – јавната честитка до поранешниот сопруг – покажа дека со текот на времето страстите се смириле. Зад бурното минато останува приказната за една од најголемите холивудски диви, која денес ја избира тишината наместо рефлекторите.
