Питер Ј. Нигард (79), финско-канадскиот моден претприемач и основач на компанијата за производство на облека за жени „Нигард интернешнл“, е уапсен во вторникот под обвинение за трговија со луѓе, со цел сексуална експлоатација, рекет и други злосторства, во кои биле вклучени повеќе десетици жени, меѓу кои и малолетнички, пишува „Њујорк тајмс“.
Со децении вршел сексуални злосторства
Федералните обвинители од Канцеларијата на јавниот обвинител на САД во вторникот отворија обвинение против Нигард, а како што велат, постои сомневање дека неговото криминално однесување траело со децении и дека злосторствата ги извршил во САД, Канада и на Бахамите.
Нигард е уапсен во Винипег, Канада, на барање на САД и врз основа на договор за екстрадиција.
Обвинителите тврдат дека Нигард го користел влијанието на својата компанија и вработените во период од 25 години за да регрутира полнолетни и малолетни жени, а потоа ги искористувал за исполнување на сопствените сексуални нагони и на нагоните на неговите пријатели и познајници. Жените често доаѓале од сиромаштија, а некои биле злоупотребувани и пред Нигард да ги регрутира.
Во обвинението се наведува дека Нигард сексуално злоупотребил некои од своите жртви, додека други жени биле сексуално злоупотребувани од неговите соработници. Обвинителите велат дека соработниците на Нигард некои жени ги дрогирале за да „осигурат дека ќе ги исполнуваат неговите сексуални желби“.
Нигард уживаше репутација на плејбој, а еднаш рече дека младите жени што биле во негово друштво биле „изворот на младоста“. Родениот Финец со канадско државјанство, својата мултинационална модна компанија ја основал пред повеќе од 50 години во Винипег.
Нигард ја напушти компанијата „Нигард интернешнл“ во февруари годинава откако агентите од Федералното истражно биро (ФБИ) извршија рација во неговиот дом во Лос Анџелес и во канцеларијата на неговата компанија во Њујорк.
Изнајмил проститутка да ги силува неговите синови
Двајца од неговите синови го обвинија во август дека изнајмил проститутка за да ги силува, а Нигард, наводно, рекол дека сакал таа да „направи мажи од нив“. Во тоа време, едниот син имал 14, а другиот 15 години.
– Се надевам дека моето искуство ќе им помогне на другите луѓе да проговорат за тоа што им се случувало – рекол постариот син во интервју за Си-би-ес њуз.
Тој додал дека чувствувал збунетост и срам и дека многу нешта му се разјасниле кога неговиот татко, сопственик на модната империја, бил обвинет за трговија со луѓе.
