Горан Булатовиќ Манза, тапанар и еден од основачите на легендарната српска рок-група „Партибрејкерс“, почина на 67-годишна возраст. Веста за неговата смрт ја соопшти самиот бенд преку објава на својата официјална фејсбук-страница.
„Партибрејкерс“ се простија од својот долгогодишен член со кратка и емотивна порака, нарекувајќи го Манза неповторлив и заблагодарувајќи му за сè што оставил зад себе.
Бендот „Партибрејкерс“ е основан во 1982 година во Белград. Покрај Горан Булатовиќ Манза, меѓу основачите се и фронтменот Зоран Костиќ – Цане, како и гитаристите Љубиша Костадиновиќ и Небојша Антонијевиќ – Антон.
Првиот настап го имаа на 4 октомври 1982 година во белградскиот „Дадов“, како предгрупа на составот „The Fifties“. Оттогаш започна нивната кариера, а „Партибрејкерс“ прераснаа во еден од најзначајните рок-бендови на просторот на поранешна Југославија.
Во текот на повеќе од четири децении, групата остави силен белег на регионалната музичка сцена со својот препознатлив гаражен рок-звук и хитовите што станаа антологиски.
Засега не се објавени причините за смртта на Горан Булатовиќ Манза, ниту информации за погребот.
