Македонскиот пејач Боби Мојсовски преку објава на Фејсбук порача дека нема намера да ѝ се врати на музичката кариера, реагирајќи на честите коментари и прашања од луѓето кои, како што вели, и по осум години од неговото повлекување од сцената го убедуваат повторно да почне да пее.
Тој напиша дека му пречи што непознати луѓе најпрво му коментираат за неговиот физички изглед, а потоа инсистираат да се врати во музиката.
„Сакам еднаш засекогаш да расчистиме една работа. ТОЈ Боби (пејачот) веќе го нема. Конечната одлука ми е донесена одамна, многу одамна, тој живот го оставив во минатото, скроз го заборавив и немам апсолутно никаква намера некогаш да се вратам“, напиша Мојсовски.
Тој истакна дека денес е сосема поинаква личност и дека не го интересира што мислат другите за неговиот изглед, уверувања или животен пат.
Мојсовски откри дека целосно е посветен на новата професионална кариера и дека денес работи како развивач на видеоигри.
„Сега сум full-time game developer, 1000% фокусиран на мојата фирма, градење игри, 3D моделирање, дигитална уметност и претприемништво“, напиша тој, додавајќи дека со задоволство разговара за развој на видеоигри, програмирање, дизајн, инвестирање во криптовалути и акции, како и за кариерен развој, но не и за неговото музичко минато.
