Српската пејачка Марија Шерифовиќ повторно ја разбранува јавноста со контроверзни изјави во врска со состојбата на естрадата. Во најновото интервју за телевизијата К1, таа остро се осврна на музичките изданија на нејзините колеги, нарекувајќи ги „сељачизам“ и предупредувајќи дека „ќе изумреме сите поради неталентирани луѓе“.
– Што сè излезе на домашната сцена? Емина ми е кул, иако не сум седнала убаво да ја слушам. Единствено што сум слушнала со внимание е Дино. И тоа е сè. А инаку, го гледам сето останато и, да знаеш… Ќе изумреме од сељачизам и од луѓе без талент. Ќе изумреме сите, ама добро, додека има кој да го слуша тоа – нека се живи и здрави. Не знам што да кажам. Многу е, баш многу сељачизам – изјави пејачката.
Иако веќе не е дел од жирито на музичкото шоу „Ѕвездите на Гранд“, Шерифовиќ очигледно продолжува да дава стручни коментари, овојпат насочени кон нејзините колеги.
Во истото гостување, таа се осврна и на постарите изведувачи на естрадата, оценувајќи дека по шеесеттата година не треба повеќе да се занимаваат со музика. Нејзиниот коментар предизвика бурни реакции во јавноста.
– Се восхитувам на некои мои колеги, ама страшно ми е кога ќе видам некој седнат, полужив, изморен, не личи на ништо и пее. Па ако не си заработил пари за сите тие години… Не знам што да кажам. Нека си сади цвеќе ако му е здодевно – изјави таа, откривајќи и дека ѝ забранила на својата мајка Верица Шерифовиќ да продолжи да пее.
– Првпат јавно зборувам за тоа. Ѝ реков: „Верице, нема повеќе да пееш“. Тешко ѝ беше. Ми рече дека сака да има свои пари, дека не сака да зависи од мене. Јас сето тоа го разбирам, ама ѝ реков: „Мајко, моите пари се во некој сеф, некаде, во коверти. Само оди, земи и живеј како што сакаш“.
