Форбс минатата недела ја тргна ријалити-ѕвездата Кајли Џенер од листата на најмлади милијардери, откако протекоа детали дека станува збор за мрежа од лаги.
Семејството Џенер додаде неколку работи на листата на Кајли, со цел да ја прикажат како најмладата милијардерка, но се испостави дека кралицата на кармините има „само“ 900 милиони долари.
Само минатата година Кајли потрошила повеќе од 130 милиони долари, а парите ги вложила во недвижности и во приватен авион. Пред да започне пандемијата на коронавирусот, Кајли си купила авион вреден меѓу 50 и 70 милиони долари, пишува Дејли мејл. Пет милиони годишно и се потребни само да го одржува авионот.
Најмногу потрошила во април годинава кога купи вила вредна 36,5 милиони долари во луксузниот кварт Холмби Хилс. Купила и парцела покрај вилата вредна 15 милиони долари. Си набавила и земјиште во близина на Палм Спрингс за 3,25 милиони долари, каде што планира да изгради ексклузивен клуб.
Освен што е великодушна кон себеси, Кајли се грижи и за хуманитарните акции, па донирала милиони долари за здруженијата погодени од коронавирусот.
Од друга страна, нејзините славни сестри се загрижени поради тоа што Кајли толку троши. Извор близок до кланот Кардашијан-Џенер истакнува дека нејзините постари сестри се загрижени бидејќи Кајли не разбира колку е лесно да се потрошат тешко заработените пари.
