Холандската светска шампионка во брзо лизгање, Џој Бене, за првпат позираше за домашното издание на списанието „Плејбој“.
Нејзиното момче Кјелд Нуис, исто така лизгач на брзи патеки, ја убедил да позира за ова машко списание, пишува „Дејли мејл“.
Бене е целосно гола на насловната страница, само со пар ракавици со кои ги покрива своите интимни делови.
Инаку, Бене има 302.000 следбеници на Инстаграм, а на почетокот на годинава стана светска шампионка во брзо лизгање и освои златни медали во трката на 5.000 метри.
Се смета дека таа е најголемото име кое позирало за холандскиот „Плејбој“ во последните десет години. Таа признала и дека и самата била изненадена од позитивната реакција бидејќи била загрижена дека многумина ќе ја критикуваат затоа што позирала за ова списание.
„Ова е многу убаво да се слушне. Не очекував да бидат продадени толку копии. Очекував многу критики, но слушам само убави пораки и дека сите мислат дека е неверојатно кул“, изјави таа откако слушна за големиот успех на нејзината насловна страница.
Рекла и дека порано се сомневала во изгледот на своето тело, но сега се чувствува безбедно во сопствената кожа.
„Имаше моменти кога се споредував со други брзи лизгачи. Сите тие се супер тенки и имаат неверојатно затегнато тело. Тогаш помислив дека сум претешка. Но, тоа е глупост, треба да се храните добро, потребна ви е енергија“, рече таа.
Во Холандија, „Плејбој“ има тираж од околу 30.000 примероци, но овој месец, на првиот ден од излегувањето на списанието, продажбата беше десет пати поголема поради популарноста на девојката на насловната страница. Поради ова, „Плејбој“ за првпат во Холандија го препечати списанието, а оттаму истакнуваат дека вакво нешто не се случило во 11-те години колку што списанието излегува во Холандија.
