Бијонсе ја отвори вчерашната комеморација за погинатиот кошаркар Коби Брајант и неговата ќерка Џиана во „Staples Center“ во Лос Анџелес. Пејачката со емотивната изведба на песните „XO“ и „Halo“ разнежни 20 илјади луѓе.
„Овде сум бидејќи го сакам Коби и ова е една од неговите омилени песни. Ќе започнам повторно, но сакам да го направиме тоа сите заедно, да пеете толку гласно што ќе се слушне вашата љубов“, рече Бијонсе пред изведбата на песните. Додека ја изведуваше „Halo“ таа ѝ порача на Ванеса дека Коби и Џиџи ќе бидат нејзините ореоли (анг.halo). Бијонсе пееше во златно одело, поточно истата нијанса како дресот на Коби.
На комеморацијата „A Celebration of Life“ настапи и Алиша Кис, а емотивни говори одржаа Џими Кимел и Мајкл Џордан.
Сепак, најемотивниот говор на вечерта го одржа Ванеса Брајант која го прочита своето љубовно писмо за покојниот сопруг и нивната ќерка.
„Бог знаеше дека тие двајца не можат да бидат на оваа земја еден без друг. Поради тоа ги врати на небото заедно“, раскажа низ солзи Ванеса.
Инаку, 24 февруари е датумот кој е со посебно значење за семејството Брајант, бидејќи Коби го носеше дресот со број 24, а Џиана со бројот 2.
На комеморацијата настапи и Кристина Агилера, која ја изведе емотивната верзија на песната „Ave Maria“.
