На 61 годишна возраст ненадејно почина доајенот на македонската музика, хармоникаш и композитор, Милан Завков.
Завков е познат и како првенец на Танец и долгогодишен раководител на оркестарот.
Хармоника почнал да свири уште од дете, од 8 годишна возраст, а првиот јавен настап го имал веќе на 14 години, како дел од оркестарот на Ѓорѓи Димчевски во ансамблот „Млад Танец“. Во раните години, Завков свирел во КУД „Мирче Ацев“. Во времето кога се запишал на студии, немало отсек за хармоника. Така, тој дипломирал на музичката академија во Скопје, а главен инструмент му бил контрабас. Со октетот „Македонија“ ја снимил својата прва плоча, во 1970 година со четири ора.
Работел заедно со саксофонистот Ферус Мустафов, и бил долгогодишен член на групата „Македонски мерак“, а подоцна и на дел од ансамблот „Танец“ како симбол на македонскиот традиционален фолклор.
Автор е на голем број песни, изведувани од страна на Виолета Томовска, Гоце Арнаудов, Ефто Пупиновски, Благица Павловска, Анета Мицевска, Ленче Кукиќ и Горан Кукиќ.
За повеќе музичари беше сакан учител, а секако Завков беше идол на многу генерации хармоникаши, столб на македонската музика.
Музичкиот свет, пријателите, неговите обожаватели и ученици се простуваат од него на социјалните мрежи.
&;
Ќе живее преку неговите песни и изведби кои остануваат трајно во македонската музичка ризница.
