Со падот на температурите се приближува и почетокот на грејната сезона, а пред да ги вклучите радијаторите, добро е да одвоите малку време за нивно темелно чистење.
Иако надворешната страна на радијаторите редовно се брише во многу домови, прашината што се собира меѓу и зад нив често останува незабележана. Насобраната нечистотија може да го намали ефикасното ширење на топлината низ просторијата, а со тоа да придонесе и за поголема потрошувачка на енергија.
Според експертите за греење, редовното одржување на радијаторите е еден од едноставните начини со кои може да се подобри нивната ефикасност и да се намалат трошоците за греење.
Како правилно да ги исчистите радијаторите?
Најпрво исклучете го греењето и почекајте радијаторите целосно да се изладат. Освен што е побезбедно, прашината полесно се отстранува кога површината е студена.
Потоа со правосмукалка исчистете го просторот околу и под радијаторот. Доколку имате тесен и долг додаток за правосмукалката, искористете го за да стигнете и до просторот меѓу ребрата.
За потешко достапните делови може да употребите долга четка за прашина. Едноставно решение е и дрвена лажица околу која ќе завиткате крпа од микрофибер или стар пешкир. Пред чистењето поставете влажна крпа под радијаторот, за прашината што паѓа да се задржи на неа наместо повторно да се рашири низ просторијата.
За тврдокорната прашина може да помогне и фен за коса, со кој нечистотијата внимателно ќе ја издувате кон крпата поставена под радијаторот.
Не заборавајте ги ѕидовите околу радијаторот
Откако ќе ја отстраните прашината, радијаторот можете да го пребришете со крпа натопена во вода со малку сапун. Потоа поминете го со чиста влажна крпа и добро исушете го за да не останат капки вода на металната површина.
Проверете ги и ѕидовите и лајсните во непосредна близина, бидејќи и таму често се наталожува прашина. Најдобро е да ги пребришете со малку навлажнета крпа за нечистотијата да не се разлета низ просторијата.
Откако радијаторот целосно ќе се исуши, греењето може повторно да се вклучи.
Чистењето не треба да биде само подготовка пред почетокот на сезоната. Додека радијаторите работат, струењето на топлиот и студениот воздух постојано ги движи честичките прашина низ просторијата, па постапката е добро да се повторува и во текот на зимските месеци.
