Пејачот Дарко Лазиќ ноќеска доживеал сообраќајна несреќа на автопатот во Нов Белград, додека со него во автомобилот била и неговата сопруга Катарина Лазиќ, која седела на совозачкото место.
И двајцата по несреќата биле хоспитализирани, а потоа пуштени на домашно лекување. Српските медиуми јавуваат дека Дарко, откако ја напуштил болницата, продолжил во кафеана и продолжил со забавата со завои на главата.
Најновите информации откриваат дека автомобилот „мерцедес“ со кој управувал пејачот не бил во негово сопствеништво, туку бил изнајмен. Штетата се проценува на неверојатни 120.000 евра.
Како што пренесуваат медиумите, Дарко во моментот на несреќата бил во алкохолизирана состојба со повеќе од 1,9 промили алкохол во крвта, а одамна нема важечка српска возачка дозвола затоа што му е одземена. Тестот за дрога покажал негативен резултат.
Според извор близок до пејачот, на инцидентот му претходела жестока расправија помеѓу Дарко и Катарина. Тие присуствувале на промоцијата на песната на сестрата на Катарина – пејачката Тијана Матиќ, каде што дошло до несогласување кое кулминирало пред патот кон дома.
Во првата изјава за медиумите, Дарко Лазиќ објаснил како дошло до сообраќајката, но вели дека настаните не ги памети јасно.
„Изгубив контрола. Гледам дека сите пренесоа дека сум бил во алкохолизирана состојба и се споменуваат недозволени супстанции. Јас ГИ имам сите наоди од болница. Фала му на Бога, никој не настрада, преживеавме. Сопругата ми е добро, јас добив повреди на главата, ништо страшно. Падна дожд, автомобилот се занесе и удрив во автобус. Среќа, во автобусот немаше патници, никој не е повреден. Сите сме живи и здрави,“ изјави пејачот.
