Тијана Дапчевиќ на Инстаграм објави емотивна порака во која се обрати себеси, односно на десетгодишната Тијана Дапчевиќ.
Таа на малата Тијана и даде совети за иднината, ја потсети на важни работи, ја охрабри, но и ја утеши за сè она што ја чека во животот.
Еве ја нејзината објава:
– Драга мала Тијана, заврши го училиштето. Глупав почеток, знам. Оваа порака можеше да почне на илјада поинакви начини, ама почна со училиштето, извини. Но училиштето е навистина важно. Не толку за опстанок, колку за главата.
– Уживај. Не грижи се, ќе има уште многу уживања, имаш само 10 години. Небото те сака. Верувај им на родителите, тие ти посакуваат само најдобро. Послушај ги кога мислиш дека треба, а секогаш сослушај ги. Подоцна ќе сфатиш дека биле во право и во ситуациите кога си била убедена дека си попаметна.
– Измиј ги рацете. И пред и по јадењето, задолжително. И гледај секогаш сè да ти биде чисто: и главата и собата и дворот. Кога сме кај дворот – гледај си го само својот. Не јади сè што лета – немој да си подводлива, не верувај секому. Чувај ги пријателите. За вечера не јади само виршли, земи некогаш и нешто друго. Намали го мајонезот. Секогаш музиката ќе ти биде лек, виолончелото другар, а сцената дом. И биди малку поамбициозна.
– Барај ја Тамара и понатаму, не престануваj да ја бараш од Брана и од Велко зашто ништо поубаво во животот сè уште не ти се случило. Другиот дел од тебе е кај неа. Подоцна твоите маици ќе бидат кај неа, ама тоа не е важно.
– За десетина години ќе го запознаеш Милан. Нему верувај му најмногу. Немој да имаш тајни пред него, а нема ни да сакаш да имаш, ќе видиш, ќе ти биде глупаво ако нешто не поделите. Ќе се иселиш од Скопје и тоа ќе биде момент кога не ти е важно во кој град си, туку кој е таму со тебе, па само вселената ќе ви биде доволна. Оттогаш сите мисли ќе ти почнуваат со множина и зад секоја ќе стои љубовта.
– Ќе дознаете дека ќе добиете дете. А потоа сепак нема да добиете. И тоа баш така, во една безвезна реченица, како ништо да не се случило, како само да си испуштила од рацете купче џамлии со кои сега ти е полна собата. Kако сè да било само сон… Можеби и е, којзнае.
– Подоцна пак ќе ја слушнете онаа убава вест, ама овој пат е вистинска. Никој не се шегува, никој не сонува. Се гледаш ли сега себеси? Е, таков ќе биде и тој. Ќе го земе само најдоброто од мама и од тато, да биде цел човек. Кој би рекол, а? Ти мајка! Кога ќе дојдеш до тој дел, ќе видиш дека целиот живот пред него бил генерална проба.
