Неда Украден приреди одлична атмосфера на настап во еден белградски локал, а во разговор за „Блиц“ откри детали за својата кариера која трае веќе половина век.
Таа зборуваше за успесите, но и за предизвиците со кои се соочувала низ годините, од кои секогаш излегувала посилна.
– Со мене вечерва се мојата ќерка, зетот, драги луѓе и пријатели, се чувствувам како дома. Иако се образував за нешто друго, одбрав да се занимавам со тоа што го сакам, а најубаво е кога и другите го ценат тоа. Ова е талент од Бога. Мојата професија го обоја животот со неверојатни бои. Не паметам да сум се вратила од концерт без букет цвеќе или убаво вино. Низ годините собрав многу спомени, мали, но драгоцени моменти. А да не зборувам за прекрасните песни што сум ги испеала и за соработниците со кои сум работела – раскажа пејачката.
Започнала да пее на 16 години, а денес, со 50-годишна кариера, открива дека клучот на успехот е во комбинацијата на талент, среќа и посветеност.
– Освен што треба да сте талентирани и среќни, важно е и да бидете упорни, да имате професионален однос кон медиумите, кон публиката и да размислувате за иднината. Музиката, како и животот, постојано се менува, бара новитети – вели Неда.
Пејачката призна дека 90-тите години ѝ биле особено тешки.
– Тоа беше трагичен период за мене и моето семејство. Ги загубив соработниците, пазарот, буквално сè. Почнував од нула, без никакви правила на игра – раскажува таа.
Но, почетокот на 2000-тите ѝ донесе голем успех.
– Албумот што го снимив со последните пари се покажа како одлична одлука. Тие песни и денес се хитови. Тоа беше одличен дел од мојата соработка со „Гранд“ – вели Неда.
Пејачката има тројца внуци – близначките Александра и Неда и внукот Душан.
– Внуците ми се прекрасни, три сосема различни карактери, како да не се од истите родители! Никој не сакаше нешто специјално за роденден, само Душан замоли да не му купуваме облека и обувки – само игрици! Малата Неда физички е копија на баба ѝ. Душан е вистински математички гениј, тој талент не го наследи од мене! А Неда фантастично црта, нејзините цртежи веќе беа изложени на изложба – со гордост вели пејачката.
Иако е зафатена со кариерата, Украден го негува семејниот живот.
– Сите сакаат кога јас готвам! Неделниот ручек е нешто што го наследив од мајка ми и баба ми, тоа е наш семеен ритуал. Во суштина, јас сум готвачка во тело на пејачка! – се смее Неда.
Таа откри дека нејзините внуки веќе се девојки и дека нивниот дом е полн со козметички производи.
– Бањата ни е преполна – креми, шампони, мириси, сè за нега! Водат грижа за себе, а јас се трудам да им дадам добри совети. Животот не е само успех, убавина и богатство – има и друга страна – заклучува пејачката.
