Инстаграм ја цензурираше американската пејачка Мадона поради ширење лажни информации за наводниот лек за коронавирусот, откако пренела исечоци од видео, кои на Твитер ги пренесе и американскиот претседател Доналд Трамп.
Во објавата пејачката, која ја следат 15,4 милиони луѓе, тврдi дека проверената вакцина е на располагање веќе со месеци, но се држи во тајност за „богатите уште повеќе да се збогатат, а сиромашните и болните да бидат уште поболни“.
На тврдењето го додала видеото на американската лекарка Стела Имануел, која го фали хидроксихлорокинот како чудесен лек за коронавирус.
„Никој не мора да се разболи. За вирусот постои лек и се вика хидроксихлорокин“, се зборовите на Имануел во видеото. Таа лобира против носење маски и против забраните.
Различни делови од обраќањето на д-р Имануел се шират на интернет изминативе денови. Делувањето на хидроксихлорокинот, лекот против маларија, не е докажано како ефикасно против короната.
„Го отстранивме видеото поради лажни тврдења за лековите и методите за превенција од корона“, изјави портпаролката на Инстаграм и појасни:
„Луѓето кои реагираат, коментираат или го споделуваат видеото ќе добијат пораки со кои ќе бидат упатени кон веродостојни информации за вирусот.
Мадона пролетва беше позитивна на коронавирус, а во мај објави дека целосно се опоравила.
