Легендарниот пејач на народна музика, Халид Бешлиќ, веќе неколку дена се наоѓа на болничко лекување, поради што беше принуден да ги откаже закажаните концерти.
Во јавноста кружат бројни шпекулации околу неговата здравствена состојба – од информации дека веќе излегол од болница, па сѐ до тврдења дека е во тешка состојба. Сепак, неговиот менаџер Недим Срња ја разјасни ситуацијата.
„Халид моментално е префрлен на клиника за онколошки пациенти, се чувствува добро, прима терапија и оди на подобро. Сакам да демантирам гласини дека му откажале органи или дека е во лоша состојба – ништо од тоа не е вистина,“ изјави Срња.
Бешлиќ прво бил сместен на одделот за нефрологија во Клиничкиот центар на Универзитетот во Сараево, откако пред неколку недели го откажа настапот на Саемот на слива во Градачац.
„И покрај огромната желба да биде со својата публика на првата саемска вечер, Халид мораше да го стави здравјето на прво место и да започне процес на рехабилитација,“ стоеше во соопштението на туристичката заедница на Градачац.
