Македонската инфлуенсерка Александра Шијакоска секогаш отворено зборува за своите животни искуства, а нејзините родендени низ годините станаа симбол на надеж.
Кога наполни 29 години, со неверување напиша: „Да ми кажеше некој дека ќе се борам со тумор, ќе му се изнасмеев“. Година подоцна, славеше со мислата дека тоа можел да ѝ биде последниот роденден, но сепак, на 30. роденден уживаше на остров во Африка. Лани, 31. роденден го одбележа со голема забава, а годинава нејзиниот 32. роденден има ново значење – првпат го слави како мајка.
„Овој роденден ми е посебен, прв роденден како мајка. Прв роденден како не сум возбудена за мојата дата на раѓање, затоа што сега имам друг ден кој ми значи се на светот.
Како и секогаш желбата е иста, да ми се живи, здрави и на број саканите сега со една плус, да гледам како расте синко и да бидам покрај него“, напиша Шијакоска во описот на роденденската фотосесија, која ја направи фотографката Симоне Калица.
Да потсетиме, Александра Шијакоска и нејзиниот сопруг Едмонд Весели го изговорија судбоносното „да“ пред речиси две години, а станаа родители на синот Ријан во ноември минатата година.
Весели ѝ беше најголема поддршка на Шијакоска додека ја водеше тешката здравствена битка со туморот на мозокот, случај за кој лекарите велеа дека бил еден од најкомплицираните со кои се сретнале.
