Пејачката Маја Николиќ не се пласираше во финалето на српската „Песма за Евровизију 2025“, а од крајот на втората полуфинална вечер постојано се огласува на социјалните мрежи.
„Според гласовите на народот и медиумите, јас сум апсолутен победник и ограбена сум, затоа што требаше да влезам во финалето. Сите го знаат тоа! Жирито ми даваше нули, а жирито вклучуваше ликови како Лук Блек, Фирчи тапанарот итн… Значи, ние сме апсолутни морални победници и благодарам на РТС што ме направи жртва и српска хероина затоа што навистина тоа сум! Важно е да знаете дека сите заедно згрмевме и распарчивме и секако моравме да се пласираме во финалето бидејќи бевме најдобри! Ви благодарам на сите, драги мои! Благодарност до сите медиуми! Ви благодариме за љубовта! Мојот син Лазар и јас достоинствено ја издржавме оваа неправда и ова големо искушение. Ме чекаа два членови од обезбедувањето, јас се пресоблекував, а тие велат: „Чекаме Маја да ја исфрлиме од РТС. Толку за праведното ПЗЕ, а јас по шести пат поминувам низ истото. Се е исто „само него го нема“. Дури и РТС се срами затоа што морав барем да влезам во финалето! А велам дека песната ми е најголем хит! Имам и најдобор настап и најдобра песна на ПЗЕ 2025“, напишала Маја.
Да потсетиме, Маја првиот јавен настап го имала на седумгодишна возраст на фестивалот „Мајска песма“ во Ниш, кога пеела во дует со својот брат и ја освоила првата награда. Од музиката многу рано го заработила и својот прв хонорар.
Почнала да пее на 13 години во кафуле и пицерија. Пеела џез, соул, евергрин. На 15-годишна возраст, таа и нејзиниот брат ја основале групата „Мар-Маја“. Во далечната 1989 година добила понуда да издаде за загрепски „Југотон“. Меѓутоа, војната започнала и сè пропаднало.
