Данската тенисерка вчера и официјално на 29 години замина во пензија.
Каролина Вознијацки со поразот од Онс Жабер во третото коло на Австралија Опен и официјално замина во тениска пензија.
Богата кариера на данската тенисерка ја одбележаа успесите на терените на кои освои 30 ВТА титули, една грен слем титула и беше прва тенисерка на ВТА ранг листата, но и поради бурниот живот кога не се дружеше со рекетот.
Вознијацки е една од првите жени тенисерки по 2000-тите години која се согласи да се слика гола за магазинот „Спортс Илустрејтед“, исто така имаше бурен љубовен живот „дружејќи“ се со ѕвезди како Кристијано Роналдо, Фернандо Торес, но имаше и откажана свадба со голферот Рори Мекилрој. На крајот Вознијацки се венча за поранешниот НБА кошаркар, Дејвид Ли.
Каролина е родена во Одензе во спортско семејство на полски емигранти. Нејзината мајка беше одбојкарка, а татко и беше фудбалер. Со 15 години стана професионална тенисерка и веќе наредната година влезе помеѓу најдобрите 100 на ВТА ранг листата. Оттогаш Вознијацки постојано е во врвот на женскиот тенис и ќе биде запаметена како голем борец на терените.
Сепак, како што беше успешна нејзината професионална кариера, таа имаше бурен приватен живот.
Еден од најинтересните моменти од нејзиниот живот е нејзината „афера“ и преписка со Кристијано Роналдо поради која медиумите веруваа дека се во врска, а тие не ги демантираа ваквите вести.
Имено, Роналдо и Вознијацки се допишуваа преку Твитер и се расправаа дали е подобро на тренинг да оди со „ферари“ или „ламборџини“, Португалецот сакаше да оди со „ламборџини“ бидејќи „ферарито“ било многу тивко.
Вознијацки се забавуваше и со Фернандо Торес, а од колегите тенисери, медиумите ја доведуваа во врска со Рафаел Надал и со Хуан Мартин дел Потро, додека Данката потврди дека се забавувала само со Фернандо Вердаско.
Најголемиот бродолом во љубовниот живот го доживеа кога беше во врска со голферот Рори Мекилрој. Иако имаа закажан датум за свадба, а поканите им беа поделени на гостите, Мекилрој одлучи да ја откаже свадбата и да ја остави Каролина буквално сама пред олтарот бидејќи не бил спремен за брачен живот.
– Бев уништена, прво мислев дека се шегува со мене. Планирав моминска вечер. Телефонот ми полуде, но не можев да зборувам со никого – зборува Вознијацки која цели две години беше верена за Мекилрој.
По големото разочарување со Рори Мекилрој, Вознијацки започна да го живее животот по свои правила и одлучи да ужива. Често пати знаеше да ги изненади фановите со разголени фотографии, а се сликаше и гола за насловната страница на мгазинот „Спортс Илустрејтед“.
Во 2018 година конечно и тргна и во приватниот живот, откако го освои својот прв и единствен грен слем трофеј, овјави дека е верена со поранешниот НБА кошаркар, Дејвид Ли. Во 2019 година во Тоскана се венчаа, откако претходно Ли ја запроси Каролина со дијамант од 8.88 карати, бидејќи осумката е среќниот број на тенисерката.
На свадбата присуствуваа голем број на спортисти, а улогата на деверува ја доби нејзината најдобра пријателка, Серена Вилијамс.
